09.02.13.
Köpden bäri ýazyp
bilmedim. Belki, iň ýazylmaly günler geçip gitdi. Ýene-de kino almak meselesi
başlandy. “Heserlini” şu ýylyň planyna goşupdyrlar. Ýöne gysga metražly film
diýipdirler. Režissýor meslesem öňki ýaly, näbelli. Niçigem bolsa, biz (Ylýas bilen) el çekemizok,
inşaalla “Heserliden” gowy kino bolmasa-da, utanman dost-ýaryňa görmäge diskini
paýlap boljak kino bolar diýen tamamyz bar. Häzir hemme zat suwuň ýüzünde, anyk
belli bolmansoň, anyk zat ýazasym gelenok. Gynanýan zadym, ýaş oglanlardan kino
ugrundan daşary ýurtlara gidip, diplom alyp gelýänleri ýok. Garrylar garrady,
orta ýaşdakylaram boşa ýakyn, ýaşlaram ýok. Kino diýilýänem bir adamdan, diňe
ýazyjydan bitýän iş däl. Belki, şonuň üçin bu işe başyňy agyrdyp, wagtyňy
ýitirip oturmagam gerek däldir, ýöne halkyň kino göresi gelýär, onda-da gowy
kino. Eger şeýle kinolar köpelse, edil bir mekdep ýaly, halkyň sowadyna,
medeniýetine, häsiýetine, aň-düşünjesine gowy täsir etjekdigine ynanýaryn.
Hawa, hyýaly ýaly görünýär, bolmajaga meňzeýär, emma, kimdir biri etmeli,
edeliň diýmeli ol kimdir birem öz aramyzdan bolmaly, onuň asmandan gaçmajagy
belli. Biziňki bir synanşyk, arzuw, isleg. Gynandyrýan ýeri köp kişi muny real
hasaplanok. Şonuň üçin, “Puluny bir alaly, kino-da barýarka bolar-da”
diýýärler. Elbetde, bolar. Ýöne şol ýüregi ynamsyzlar işe päsgel
berýändiklerini duýmaýarlar. Gelip-gidýärler, aýlyk alýarlar, bir zatlar
diýýäler, emma, işiň bähbidine iş edýän ýok diýen ýaly. Men bu zatlary nalap
ýazamok, gynanybam ýazamok. Hatda bolmaly zat ýaly hasaplaýan. Emma, bolmaly
zat däl. Şonuň üçinem ol bolmaz, şu gün, ertir, birgün... bolsa bolar, emma,
ýuwaş-ýuwaş çüýrükligi sebäpli päsgel berip bilmez. Esasy zat, ugry düzüw, ýol
dogry, düzeljegi görnüp dur. Bziem bu işe azajygam bolsa goşant goşjak
bolýandygymyza begenýän. Inşaalla “Heserli” hakynda pikirleriňizi ýazarsyňyz,
menem hasam begenerin...
Teswirler (0 sany)
Teswir ýazmak üçin içeri girmegiňizi haýyşt edýäris.