17.03.13.
Indi näçe gündir başymy ýassykdan galdyryp bilmedim. Dümew degdimi ýa-da
howanyň üýtgemesinden boldumy, hiç zada elimi uzadasym gelmedi. Indi
başardygymdan yzyny ýazjak bolaýyn. Hawa, aňansyňyz, nesibäm çekip, ilki Medinä,
soňam Mekgä bardym. Hakykatdanam, başga bir dünýä düşdüm. Şu ýaşyma çenli köp
ýurtlary gördüm, emma barsyny jemleseň, Medinäň ýeke gününe degmez. Dünýe
aladalary, (hatda şol ýeriň dükanlaryna-da az gitdim) daşlaşyp, diňe ruhuň
bilen ýaşaýaň. Ruhuňy ynjatjak zat ýok diýerlik. Gybatlar, boş gürrüňler ýoga
golaý azalýar. Hatda birgezek birden içimden ýaramaz pikir geçdi welin, nädip
elimi gapa gajadanymy duýman galdym. Şeýle bir awundym hem toba etdim. Medine
şeýle asuda, Mesjidi Nebewi (şäheriň başga ýerine gitmedik diýibem bolar) şeýle
owadan, şeýle özüne çekiji. Pygamberimize salam bermek, Türkmenistandaky
sahabalardan, welilerden oňa salam äkitmek, “jennetiň bagynda” namaz okamak...
bularyň täsirini dil bilen düşündirmek mümkin däl. Bu mukaddes ýerlere
gitmänkämem şeýle üýtgeşik duýgulary ýaşajakdygymy aňýardym, emma göwnüme
getirenimden hakykatda ýaşanym gaty köp esse güýçli boldy. Mekgä gelemizde
15-20 ädim diňe aýagyňyzyň burnuna seredip ýöräň diýdiler, soňam durduk –
başyňyzy galdyryň diýdiler. Biz Käbäniň alkymyna gelen ekenik. Gözümiň ýaşy
saklatmady, doga etdik. Daşyna gara mata çekilen dört diwaryň nädip beýle güýje
eýe bolýanynyny düşündirip bolmaýar. Gözüň bu görnüşden gananok. Namaz
okaňda-da sežde etjek ýeriňe däl-dä, göni Käbä seredip okamak üýtgeşik duýgular
oýarýar, seni bu dünýeden alyp gidýär. Daşyňda millionlap adam bar, olaram
namaz okaýar, emma sen hiç kimi duýaňok. Ak ihrama dolanmak – munuň nämedigini
nädip ýazaýyn? Balyň tagamyny aýdyp düşündirip bolmaýşy ýaly, munam diňe ýaşap,
başdan geçirip duýup bolýar.
Ýene ir zat, türkmendigime begendim. Birden ýanymdaky ýoldaşlaryma
seredenimi duýman galdym. Türkmeniň gözleriniň täsindigini... Ol oýnaklap
duranok, çakgyň çüýi ýaly deşip baranok, ýylanyň gözi ýaly seni jadylanok,
meňzese, belki, wepadar köpegiň ynanjaň gözlerini ýatladýar...
Ýene bir geň galan zadym, gelen günüm Orsýediň TW-sinden bir gurzin alymy
prowessor tokaýda ýyl ýarymlap möjekleriň arasynda ýaşapdyr – şonda başyndan
geçirenlerini güürüň berdi. Familiýasy “B” harpdan ýaşlaýardy öýdýän, belki,
internetden taparsyňyz. Ol adam gaty geň zatlary gürrüň berdi. Ýekejesini
gysgajyk ýazaýyn. Alypbaryjy ondan “Möjekler maşgala bolup ýaşanlarynda, biri
başga bir maşgalanyň urkaçysy ýa-da erkegi bilen jynsy gatnaşyk edýärmi?”diýip sorady.
Professor: “Ýok. Olarda biwepalyk bolmaýar. Üstesine-de olar bir ýylyň içinde ýekeje
gezek çaga öndümek niýeti bilen jynsy gatnaşyk edýärler. Başga wagt olar diňe biri-birine
hyzmat edýärler, çagalaryny terbiýeleýärler, ösdürýärler, goraýarlar” diýip jogap
berdi...
Teswirler (1 sany)
Teswir ýazmak üçin içeri girmegiňizi haýyşt edýäris.
Zyýaratyñyz kabul bolsun. Geñ duýgulary basdan geçirendigiñizi duýýaryn. "Gudratlar" adatylyga öwrülýär. Käbedäki tehniki isgärlerden sizde dörän duýgulary tapmak kyn bolsa gerek.