28.03.13
Arada şäher içinde ulagda barýardyk, biri ýogalan eken, deňinden geçip gitdik.
Adatça iman baýlygyny dilänimizden soň, gürrüň ölüm hem dirilik hakynda gitdi.
Içimizden biri: “Ölmekden dogulmak kyn” diýdi. Hakykatdanam adamyň demi
sogrulýar-da, ölýär durberýär. Dünýä injek bolsa, dokuz aý enäň garnynda
ösmeli, wagty dolmaly. Ýoldaşym bir çaganyň dünýä inmegi üçin iki millioondanam
köp tohumyň ýatga gidýändigini, olaryň ýekejesinden galanynyň ýolda heläk
bolýandygyny aýdyp, entek tohumlanmagyňam kyn bir ýolagçylykdygyny gürrüň
berdi. Haýran galaýmaly san iki milliondan ýekejesi adam bolýar. Muny alymlar
“tebigy seýgi” diýip düşündirýärler. Mümkin, ýöne tebigy seçgi kanunyny goýan
hasam haýran galdyrýär. Ýöne ölmegem ilki görnüşi ýaly däl bolaýmasa. Adam jan girenden
başlap, ölüme tarap ýola düşýär. Emma, megerem, ynsanyň iň razylaşýan, ýöne boýun
alasy gelmeýän hakykaty ölüm bolsa gerek. Ol göwnüme bolmasa, ähli kişiniň öljegine
ynanýar, özi welin ölerin diýmeýär. Ajalyň islän wagty gelip özüni alyp gidiberjekdigine
ynanmaýar. Diňe ölüm ýassygynda demini sanap ýatyrka ýa-da ajal ýakasyndan tutanyny
anyk göz ýetirende ynanýar. Oňa-da giç diýýärler. “Ölüm ýassygy”, “soňky dem”, “sanalgy”
diýýär. Ýassyklaryň haýsysy seniň ölüm ýassygyň bolup bilmez? Haýsy demiň soňky,
hasysy sanalgyň däl? Ölmek aňsat bolsady, ynsan beýle gaçypatalgalar gözlemezdi.
Mekgede welin, adam özlümden gaçmaýar, gaýta, onuň bilen dost bolýar, ony doly kabul
edýär. Adam dirilik agramyny, ýüküni düşürýär, süňňi ýeňleýär. Demiň iň soňkusyna
ýetýänçä, adam million däl, milliardlarça gezek dem alýar. Hamala ähli demleriň
gelip-gitmegi, şol iň soňky dem üçin ýaly. Men Mekgä gelemde, Käbä gelmek üçin 60-dan
gowrak ýyl ýaşan ýaly boldum. Ýene düşündirmesi kyn zady düşündirjek bolýan öýdýän.
Entek namaza başlamankam “Ýaş komda” goşgularym çykypdy (birinji hem megerem, iň
soňky gezek). Şonda şeýle bir küplet bardy şu wagt ýadyma düşýär:
Güýç ber guluň bolmaga,
Aýan syryň bilmäge,
Özümi diňlemäge
Kylgyn rowa.
Teswirler (0 sany)
Teswir ýazmak üçin içeri girmegiňizi haýyşt edýäris.