07.05.13. | Gündelik | Hydyr Amangeldi07.05.13.
Maý 19, 2013 | 0 teswir | 1006 okalan
Başardygymdan ýazjak bolýan. Bir
zatlara meňzejegem ýaly. Şeýle bir wagt aralyklary bolýandyr, biri 15-20
minutdan gelmelidir, senem garaşýansyň, gelip-gitsin diýip, hiç işe başlaman
oturýaň. Menem häzir birhili şeýle ýaly. Bir minudam boş oturmaýyn diýip
bilemok. Şeýtan bahana barynam salgy berýär. Mergen Mäne baba bilen baglanşykly
bir gowy wakany gürrüň berdi. Mäne baba mesjitde wagyz etmeli eken. Adam bary
ýygnanypdyr, ýer-jaý ýok. Mäne baba-da halkyň öňüne wagyz bermek üçin çykýar.
Şol wagt oňa yzdakylardan biri: “Alla rzasy üçin, bir ädim öňe süýşüp
bilmezmisiňiz?” diýip gygyrýar. Mäne baba öňe süýşýär-de, wagyz etmän çykyp
gitmek üçin gapa ýönelýär. Oturanlar: “Wagyz etmejekmisiňiz?” diýip soraýarlar.
Mäne baba: “Ýaňky yzdan gygyran adam meniň ähli aýtjaklarymy bir sözde aýtdy.
Maňa aýdara zat galmady” diýip jogap berýär.
Bir ädim
Allaň razylygy üçin öňe süýşmek – bütin ömrüme ýeke dähedem süýşüp bildimmikäm?
Ýok. Suwuň akymynyň tersine ýüzýän ýaly, haýdadýan, öňe gidýändirin öýdüp özümi
aldaýan... Iň bärkijesi geçen günleriň birinde biri söýgi hakynda kitap
sorapdyr. Menem Ýewropa ýazyjylarynyň birnäçesiniň adyny tutdum. Soň oturyp
pikir edýän, hany Rumyň “Mesnewileri”? Ýadyňyza düşýändir söýgülisi üçin
ejesiniň ýüregini sogrup alyp barýan oglan ýykylanda enäň ýüreginiň “Ýykylaýdyňmy?
Bir ýeriňi agyrtmadyň gerek?” diýip soraýşy. Ýa-da Magtymguly “Aý Güni, asman
zemini/Söýen deý söýmüşem seni” diýýändir. Ýa-da nemes klassyklaryndan biriniň
Hafiziň poýemalaryny ene dilinde okamak üçin pars dilini öwrenişini
eşidensiňiz. Bu ýerde mesele Gündogar bilen Günbatary ýaryşdyrmak däl, biz
gündogarly, ýitiren zadymyzam günbatardan gözleýäs. Günbatar edebiýatyna
hormatym uly, ýöne gündogardan gowy fundament edinip, agy-garany saýlamagy
öwrenip, onsoň günbatary öwrenmeli. Hawa, ikisinem birden edesiň gelýär, ýöne
hem fundament guýup, hem üstüne diwar galdyryp bolmaýar. Düýn Ylýas gürrüň
berýär atly ýazyjylarymyzdan biri: “Orslar nahalstwo wtoroýe sçatýe” diýýär,
türkmenem “Töwekkeliň endişesi bolmaz” diýýär” diýip bu sözleri manydaş diýen
ýaly edipdir. Bu “töwekgel” sözüniň “nahallygyň” ýakynyna-da barmýanyny
bilmeýäniň etjek gürrüňi. Mundan soň, sen näçe ýyl Moskwada, Şukşin, Astafýew,
Rasputin... dagy bilen oturyp-turuşaňda näme? Teswirler (0 sany)
Teswir ýazmak üçin içeri girmegiňizi haýyşt edýäris.