23.05.13
Wetnamda günlerim täsirlerden doly geçýär. Dostlarymyzdan biri “Wetnam
hakynda maglumatlar şu ýerde-de bardyr” diýip bir adres beripdir, entek oňa
girip göremok, giirerin, inşalla. Geçenki ýazanlarymy başardygymdan dowam etjek
bolaýyn. Köp kişini gyzyklandyraýjak zat belki, naharlarydyr. Naharlary juda
yslydygy, hatda tagamyndanam öte geçýän ysy bilen burnuňa urýar. Özümä aşarak
duhi sepinselerem halamaýanlardan bolamsoň, mende bu yslar ýakymly, işdäňi açýan
duýgular oýarmady. Üstesine-de bu ýerleriň halklary item, çekirtge-de,
gurbaga-da iýýär diýensoňlar hasam gaşyň çytylýar, emma, bir zatlaram iýmeli-dä.
Wetnama gelmek üçin Tailandda gonup geçmeli bolany üçin, hemem wagtymyz bar
diýip Kemal bilen Bangkokda (dogry ýazandyryn-da hernä) bir gün bolduk.
Naharlarynam iýdik. Daşyna “Halal” diýlip ýazylan, musulmanlaryň gelýän
naharhanasyna gitdik. Içi her hili otlardan, burçdan, kömelekden, birazragam
towuk etinden doly çorbaly tabagy getirip öňümde goýdular. Dogrusy, bir
döwürler az-kem kynçylygam görlensoň, nahar dannamak häsiýetim ýok. Hatda gowy
görýän naharymam ýok, näme bişirip berseler iýip ýörenlden biri diýsemem
bolýar. Maňa gatyk iý diýilmese bolýar. Garaz, şeýdip, özüme ruhy goldaw berip
çorbany dadyp gördüm. Aýdyşlary ýaly däl eken – nahar tagamly eken. Ýöne
Wetnama gelelim bäri esasan balyk iýmeli bolýar. Bu ýeriniň eti tagamsyz hem
gatymyş, haýal bişýarmiş, şonuň üçin esasan üwelen et bilen balyk berýär,
gelnim. Tüweleme eli süýji, balygam ýeňil nahar. Meniň aşgazanymam
problemalyrak bolansoň, hasam gowy ýaraýar. Ýöne öňem eşidýärdim iýmitiň adamyň
häsiýetine täsiriniň bardygyny. Bärde muňa hasam göz ýetirip bolýar. Kemal
şäheriň gyralarynda, suwuň üstünde hütdük jaýjagazlarda ýaşaýan wetnamlylary
görkezdi. Garybam bolsalar agzybir, uly maşgala bolup ýaşaýanlaryny gürrüň
berdi. Soň baýlaryň willalarynyň deňindenem geçdik, şeýle raýonlarda-da aýlandyk.
Esasy gözüme ilen zat şol willalaryň töwereginde goh-galmagal, geýnüwli ýaşlar,
gymmat maşynlar görnenok, penjireden estrada aýdymynyň sesi köçä ýaň berenok. Hatda bizdäki ýaly aldygyna haýatyny ýykyp-täzeläp,
penjiresini çalşyp, ýeri betonlap ýörenem görmedim. Birhili geň ümsümlik bar.
Agşamlyk bu ýerde okaýan talyp oglanlar mhmançylyga geldiler. Hezil edip, edil,
Türkmenistandaky ýaly, otagymyzy Türkmenistanyň bir künjegine öwrüp oturdyk.
Hatda dutaram çaldyk. Oglanlaryň birki sanysy kofe plantasiýalarynyň bar
etrabyna gezelenje giden ekenler. Motorly, jübülerem kän bir pully däl ýagdaýda-da ep-esli
ýol geçip, çagba ezilip, batga batyp, kynçylyklara seretmän syýahat edýän
ogullarymyzyň bardygyna begendim. Birgiden suratlar, wideolar görkezdiler. Allaha
şükür, özlerem diňe gowugyň, arassalygyň içinde, tämiz düşünjeli ýigitler. Olar
hakynda hasam köp zatlar ýazyp bolardy, ýöne özlerem ýazýanlarymy okansoňlar,
nähili kabul etjeklerini bilmänim üçin saklanýan. Bu günlikçe, belki,
ýeterlikdir. Galanyny ýene bir gün.
Teswirler (1 sany)
Teswir ýazmak üçin içeri girmegiňizi haýyşt edýäris.
Ol oglanlar barada ýazyp bukja oklabermeli ekeni, soň ulanylardy.Aýratynam şu ýerini gowy gördüm, ýöne tankytmy öwgümi, ýa-da diňe ýagdaýa berilen synmy düşünip bilmedim.
"Motorly, jübülerem kän bir pully däl ýagdaýda-da ep-esli ýol geçip, çagba ezilip, batga batyp, kynçylyklara seretmän syýahat edýän ogullarymyzyň bardygyna begendim. "