Gurban Berdiýew hem türkmeniň iki häsiýeti
Kim bilýär, kim meniň bu gürrüňime nähili garar? «Nähili garalanda näme? Men kim?» diýýän, ýöne şonda-da her bir zada garamak meselesi gaty düýpli bir zat ýaly görünýär. Her bir zada garaýşymyz biziň ýolumyzy haýsam bolsa bir tarapa ugrukdyrýan, käte ýolumyz kesgitleýänem ýaly.
Meniň bir gyzygýan zadym bar. Soňky birki ýyldyr sypdyrman
futbol treneri Gurban Berdiýewiň özi, komandasy bilen gyzygýan. Hawa, türkmen
bolany üçin. Özümiňem türkmen bolanym üçin.
Dogrusy, men onuň «Barselonany» utup ýören, çempion bolup
ýören döwürlerini bilemok. Soň säwlik bilen TW-den «Rubiniň» bir oýnuny gördüm.
Agras, erjel adama gözüm gitdi. Üstesine, telekomentatoram onuň aýbyny tapjak,
garşysyna bir zatlar aýtmaga çalyşýardy, göwnüme oýnuň eminem «Rubine» garşy
ýalydy. Belki, oglanlgymdan at bilen gyzyklananymdandyr ýa-da doganlarym
sportsmen bolup ýaryşa gatnaşansoň, olara janköýerlik edenimdendir – men
«Rubiniň» oýunlaryny sypdyrman görüp başladym. Gurban Berdiýewe bolan hormatymam
gitdigiçe artdy. Käbir gybaty edilip ýazylýan makalalary okap gynandym.
Bilýänsiňiz, soň ol «Postowa» trener boldy. Ýaňy-ýakynda-da özüniň trenerlikden
çykarylan «Rubin» komandasyny, Kazana baryp utdy.
«Hawa, erjel, talapkär, işiniň ussady, agras, az sözli… adam
türkmenem eken-dä, ýeri saňa näme? Elbetde, begenip bilersiň, buýsansaňam
bolar, emma ondan aňry näme?» diýmegiňiz mümkin. Menem şeýle pikir edip köp
gezdim, hatda öz-özüme: «Boldy-laý, şu Gurban Berdili mesele. Ol adam hor
boljak, özüni ýitirjek adam däl. Biderek janyňy ýakyp, wagtyňy ýitirip ýörme» diýen
günlerimem boldy. Käte-de: «It saklap, kepderi uçuryp, horaz uruşdyryp ýören
adamlaram bar. Otluçöp gabyny ýygnap ýören garrylaram görüpdim. Ýaşymyň
soňunda, öz deň-duşum (doglan ýylymam, aýymam deň gelýär)Gurban Berdi bilen,
onuň komandasy, oýunlary bilen gyzygamda näme-de» diýýän. Ýöne meni bu zatlary
ýazmaga iteklän bu däl. Bu bir şahsy durmuş, ony köpe ýetirmek hökmanam däl.
Ýöne arada biri «Rostow» «Rubini» 3:0 eden-de, «Türkmen aga şeýdäýýä» diýdi
welin, birhili boldum. Bir hili bu garaýyşy halamadym. Aslynda, Gurban
Berdiýewiň meselesiniň iň wawwaly ýerem oňa bolan garaýyşda, ýolbaşçylaryň, beýleki
adamlaryň garaýşyndamyka diýýän. Onuň musulmandygy, eli tesbilidigi, oýundan öň
doga-dileg, utsa şükür edýändigi, milletiniň türkmendigi we ş.m. zatlara
beýlekileriň ters garaýşy ol adama uly zyýan edýäne meňzeýär. Onuň has ösmegine,
has ýokary netijeler görkezmegine päsgel berýän ýaly görünýär. Içimden «Sen
hakykatdanam Gurban Berdini gowy görýän bolsaň, onda onuň özi ýaly agras bolaý.
«Türkmen aga» bu ýere nireden geldi» diýip pikir edenimi duýman galdym.
Aslynda, begenjine diýip goýberendir, men biraz meseläni ulaldyp, çişirýän
bolmagymam mümkin. Ýöne näme üçindir türkmeni ilki tanadýan häsiýetleriniň biri
utanjaňlygy bilen kiçigöwünliligi, öwünjeň däldigimäkä diýýän. Bu iki häsiýet
biz türkmenlerde azalyberse, Gurban Berdiýew öz komandasy bilen dünýäň çempiony
bolaýanda-da näme peýdasy degjek – bilmedim. Bir döwürler «milli buýsanjymyzy
dikeltmeli, türkmeniň depesinden basylyp-basylyp kimdigini unutjak derjä çenli
ýetirdiler» diýen düşünjämiz bardy. Men häzirem milli buýsanjymyzyň peselenini
islämok. Ýöne milli buýsanç diýilýän zat özüni nädip görkezmelikä? Ine, şu
sowalyň jogabyny köp gözleýän. Aýlanýan-dolanýan, ýene Gurban Berdiýewde görýän
häsiýetlerim ýadyma düşýär. Pes
pällilik, işiňe ussatlyk, erjellik, tutanýerlilik, işeňňirlik, maksatly ýaşamak…
– munuň üstüni özüňiz ýetiriň, ýöne şu häsiýetler bolaýmasyn biziň milli
busanjymyzy görkezýän zatlar?!
«Gurban Berdiýewi gaty ulaldypsyň» diýmegiňizem mümkin.
Dogry, men onuň bilen içgin tanyş däl, oturyp-turuşmadym, bile ýolda ýoldaş
bolmadym. Diňe TW-de görenlerim, internetden okan interwýularym, makalalarym.
Olaram beýle köp däldir. Ýöne hakykatda meniň ony «ulaldyp, çişiresim» gelenok.
Megerem, ol muňa mätäjem däl. Ýönde onda türkmene mahsus utanjaňlygy,
pespälligi görýän. Şu iki häsiýetiň bizden aýrylmazlygyny, edil Gurban Berdiň
komandsynyň utmagyny isleýşimdenem beter islämsoň, saklanyp bilmän ýazaýdym.
Teswirler (1 sany)
Teswir ýazmak üçin içeri girmegiňizi haýyşt edýäris.
Salam!
Diňe türkmen bolanymyz üçin hem, hatda ynsan bolanymyz üçin hem sylag-hormata mynasyp adam Gurban aga.