Ylýas Haida
|
Hydyr aga salowmaleýkim. Siziň maşgala agzalaryňyz hakynda kakaňyz,
ataňyz,agalaryňyz hakynda ýazanlaryňyzy uly gyzyklanma bilen okadym. Emma
näme üçindir öz ekiztaýyňyz hakynda kän ýazmaýarsyňyz. Şol ýazgylar has
gyzykly hem gymmatly bolarmyka diýýän. Bu siziň iniňiziň heniz ýaşap ýöreni
sebäpli bolsa, onda ýalňyşýaňyz diýjek bolýan. Garaz, gönüjämi aýtsam, siziň
Ylýas aganyň döredijiligi hakynda pikirleriňizi bilmek isleýän. Siziň
kinolaryňyzyň edebi esasyny ýazanlar diýip ikiňiziňem adyňyz bilen çykýa. Ony
kimiň ýazýanyny bilesim gelýär. Belki Ylýas aga-da siz hakynda gowy bir zat
ýazyp biler. Gowy diýýänim taryhda galjak ýazgylar ýazar diýip garaşýan. Bu
haýyşymy oňa-da ýetirmekçi. |
Waleýkimsalam!
Maşgalamyz hakynda entek ýazmaly, ýazasym gelýän zatlarym kän. Ony öz
neberämiz, Amangeldiýewlerüçin (esasan) ýazamsoň, biraz arkaýynrak ýazýan.
Ylýas hakda-da ýazmakçy. Obýektiw ýazjak bolýan, ýöne şonda-da subýektiw
boljakdygy belli. Mesele onda-da dälmikä diýýän. Käbir meselelerde ýalan
ýazmakdan gorkýan. Çeper, gyzykly bolsun diýip, kakam gürrüň berende
owadanlaşdyraýýardy. Men şony edip bilemok. Ýalan sözläniňden bazarda oturyp
sogan satanyňam gowymyka diýýän. Aýytjak bolýanym, sogan satmak aýp diýdigim
däl, oňarýan işiňi edeniň gowy diýesim gelýär. Indi sorapsyň, häzirlikçe, Ylýas
hakda kelam agyz. Ekiz bolup dünýä inmek, dünýä inmekdenem aňyrda bir adamlyk
ýeri, ene garnynda paýlaşyp, dokuz aý ýaşamak juda täsin. Ylýas ikimiziň şol
paýlaşyp ýörşümiz. Kyn günlerem, gowy günlerem, edebiýatam, döredijiligem,
(esasan kinossenarileri) paýalaşyp ýörüs. Kinolaryň edebi esasyny men ýazýan
diýsemem, Ylýas ýazýar diýsemem ýalňyş bolar. Belki, ýaşym ulusyrap (15-30 min)
biraz gepimimi gögerdýän ýerlerim bolýar. Ýöne esasan bile ýazýas.
Ylýasyň
ýazýanlaryny gowy görýän. Inçeligini, şahyranalygyny halaýan. Meniň
ýazýanlarym, gödegräk, agyrrak, düşnüksizräk bolup çykýar. Şonuň üçin Ylýasyň
okyjysy känmikä diýýän. Ylýas durmuşda has
praktik. Iki aýagynam ýere berk diräp pikirlenip bilýar. Men biraz hyýalyrak. Mysal
üçin, bir gezek, Rumyň milleti hakynda jedel çykdy. Ol parsmy, türkmi,
türkmenmi diýen ýaly. Men Rumy ol jedellerden beýikde durýar diýdim. Ylýas
razylaşmady. Biziň myhmanymyzam razylaşmady. Gürrüň Ylýaslarda boldy. Soň
myhman gaýdansoň, Ylýas meniň aýdaýanlarymyň dogrydygyny, ýöne myhmanyň göwni
üçin onuň tarapyny tutanyny aýtdy. Men şeýle “diplomatiýany” oňaramok. Durmuşda
aljyrasam Ylýasdan maslahat soraýan. Köplenjem onuň maslahatyny diňleýän,
makullaýan. Biz bäş erkek dogan. Ylýas meniň ýeke jigim bolýar. Eger altmyşy
ortalaňsoňam jigi diýmek dogry bolsa. Aýtjak bolýanym, Ylýas bilen beýleki
agalarymdan has köp görüşýän. Ylýas bilen has ýakyn gatnaşýan.
Taryha girmek diýen ýaly bir zatlar ýazypsyň welin,
halamadym. Biz nire taryh nire?! Gurbannazar, Nury Halmämmet taryha giren
adamlar. Taryha süri bolup girilmeýärmikä diýýän. Göwnüňe alma, ýöne bu şeýle.
Kiçigöwünlilik edýändirem öýtme.
Ylýas bilen baglanşykly köp ýakymly ýatlamalarym bar.
Olary soňa goýup ýörün. Biz diňe ene garnyny däl, bir döwüm gara çöregem iki
paýlaşmaly bolupdyk. Inşalla, jigim hakda entek ýazaryn diýen umytda. Sag bol,
sowalyň bilen ekiz taýym bilen ýene bir gezek ýakynlyk duýgusyny başymdan
geçirdiň. Elimden gelse, bir halat serpaý bererdim.
Teswirler (1 sany)
Teswir ýazmak üçin içeri girmegiňizi haýyşt edýäris.
Halandy