Biziň ýüzümiz
Oglanlar
instagram diýip bir zada goşdular. Ýogsa bu pikirleri etmesemem etmezdim,
onda-da täze ýylyň öň ýanynda. Ilki gyzykdym, geň gördüm. Gaty gowy suratlar,
suratçylar bar eken. Özüm iki-ýeke surat goýdum. Beýlekileriň maňa goýýan
laýklaryny sanadym. Soňam… bir ýagdaý gözüme ildi. Instagramda köp kişi öz
suratyny goýýan eken. Dostlary bilen, ýeke özi, şatlykly, gussaly, çagalary
bilen… Belki, bolmalysam şeýledir. Her kim özüni tanadýar, tanyşýar. Gatnaşyk
gurýandyrlar. Ýöne bir zada üns berdiňizmi? Biçak ýüz kän. Her kim öz ýüzüni
görkezmäge çalyşýar. Bir gezek, iki gezek däl – birnäçe gezek ýüz keşbiňi
surata alyp, köpçülige açýaň. Görýan üçinem birinji, ikinji gezek gyzyklydyr,
soň deňinden geçip gidýändirmikä diýýän. Sebäbi her kim öz ýüzüniň aşygy, her
kim öz ýüzüniň köp görülenini, halanylanyny isleýär. Ony seň ýüzüň däl, öz ýüzi
gyzyklandyrýar. Biraz konkretleşdirýän ýalam bolýan, ýöne men umuman şeýledir
diýen pikirde. Elbetde, ilçilikdir, arasynda özüni däl, beýlekileri köp
synlaýanam, özüne däl, beýlekilere aşyklaram bardyr.
Aýplaşmaň
garrasaň şeýle bolýar eken – derrew öz döwrüň bilen deňeşdirip başlaýaň.
Hakykatdanam ýüz meselesi biziň ýaş döwrümiz nähilidi – 1970-nji ýyllar? Biz
oglankak aýnaň öňünde köpüräk egleniberseň “Näme gyz ýaly, aýnaň öňünden
aýrylaňok?” diýip käýýeýärdiler. Surata düşmegem häzirki ýaly hezillik däldi.
Gyzlaň suratyny dagy görjek bolsaň… Diňe klasdaşlar bolup bir ýörite düşülen
surat bolaýmasa. Olam iki-ýekedir. Ýöne men öz suratyň, öz ýüzüň hakynda gürrüň
edesim gelýär. Adamlaryň köpüsi (megerem) öz ýüzüni gowy görýär. Näme üçin gowy
görmeli däl? Ýadyma düşýär bir gezek Gurbannazar Ezizowam murtlyja düşen
suratyny görkezip “Lermotowa meňzeýän gerek?” diýipdi. Muň sebäbi her kimiň
ýüzi gaýtalanmaýan bir zat. Senki ýaly göz, burun, dodak… garaz, sypat başga hiç
kimde ýok. Bolubam biljek däl. Onsoň men nädip gaýtalanmajak eseri gowy
görmäýin? Yogsa meniň ol eseriň döremegine hiç hili gatanjym bolmasa-da, ol
meňki. Hudožnik surat çekýär, öz çeken suratynam gowy görýär. Bu düşnükli. Emma
bizde-de edil şol suratkeşiňki ýaly, öz keşbimize, bedenimize garaýşymyz bar.
Biz muny tebigy ýagdaý hasaplaýarys. Başga bir keseki ýüzlere welin, beýle
garamaýarys. Bu mümkinem däl. Instagramda näçe müňläp ýüz bar – nädip olary öz
ýüzüňi halaýşyň ýaly halajak? Bu şeýle. Ýöne şu häsiýetimiziň aňyrsyna bir
ýöntemlik bar ýaly bolup dur. “Daş keşbiňe däl, içki keşbiňe üns bermeli. Öz
ýüzüňe däl, iliň ýüzüne bakmaly” diýen ýaly, müň gezek eşden akyllarymyz ýadyňa
düşýär.
Kakam pahyr
gürrüň bererdi – biz Ylýas ikimiz körpe ekizleri emedekläp öňüne
baranymyzda birimizi gujagyna alyp “oglum” diýipdir. Atamam “Haý, ýüwel. Kakaň
dirikä özüň entek ogul” diýip kakamy utandyrypdyr. Bu hadysany kakam haýran
galyp birnäçe gezek gürrüň beripdi. Her saparam kakasynyň “ýüwel” diýmesini
dogry hasaplardy. Men welin, näçe islesemem atamyň aýdanyny makullap
bilmeýärdim. Sebäbi ogullarymy kakam dirikä gujagyma-da alýardym, oglumam diýýärdim.
Elbetde, kakama görünmänräk. Indiki ýaşlar bu düşünjeden uzaklaşyp gitdi. Menem
ogullarymy agtygymy gujagyna alyp, “oglum” diýeni üçin, ýüwel hasaplamaýaryn.
Indi düşünjeler, edepler, däpler üýtgäp gitdi. Olaryň haýsysynyň dogrudygynam
kesgitlemek kyn. Her däp adamlaryna, köpçülige görä.
Ana,
instoramda ýene bir ýüz ýylgyryp maňa seredýär. Oňa “haladym” diýip, ýürejik
goýaýyn. Ýöne şonda-da bu ýagdaý meni oýlandyrýar. Biziň öz ýüzümize aşa
aşykdygymyz ynjalykdan gaçyrýar. Hamala, atam aňyrdan “ýüwel” diýip duran ýaly.
Teswirler (1 sany)
Teswir ýazmak üçin içeri girmegiňizi haýyşt edýäris.
Sol pahyrlary direldip getirseñ häzir, yzyma, gabra girjek diýerdiler..