Köne-küşül
Dogrusy, näme ýazjagymy bilmedim. Onsoň "Öňki, köne-küşüllerimi göreýin" diýdim. Şeýdibem şolara dümtünip galypdyryn. Bulara "geçen asyrdan galan diýseňem bolýa. 1990-2000-nji ýyllarda ýazylan bolmaly. Ilki tapanja goşgularymdan başlaýaýyn. Bularyň köpüsi çap edilmedi.
Köp azaşdym bu ýollarda
Ýollaryň günäsi ne?
Ömrüm sowruldy ýellerde,
Ýelleriň günäsi ne?
Ykbalyň küle çökende,
Külleriň günäsi ne?
Arman etme öten güne,
Günleriň günäsi ne?
Guba-gaz gonmasa köle,
Kölleriň günäsi ne?
Ar-namys satylsa pula,
Pullaryň günäsi ne?
Ýazygym köp, ýalňyz başym,
Illeriň günäsi ne?
Ýaralydyr göwün guşum,
Nilleriň günäsi ne?
Bükülipdir inçe biller,
Billeriň günäsi ne?
Göwün sözün diýer diller,
Dilleriň günäsi ne?
Ömür geçer, geçer ýyllar,
Ýyllaryň günäsi ne?
Gubura güm sürer piller
Pilleriň günäsi ne?
Asmandaky Aý ýagtysyn
Ýigrenme.
Ýerdäki daşyň gatysyn
Ýigrenme.
Ýigrenme ýigrenjini,
Ölüm diýlen ünjüni,
Gözüňden daman hünjüni
Ýigrenme.
Aýlanar gündizi-şamy,
Biri derwüş, biri şamy?!
Adam diýlen betnyşany
Ýigrenme.
Bu göwnüm aglap duranda
Gülmeýän bolsadym käşgä.
Bu zyndan gijäň ýarynda
Ýazykdan ýansadym käşgä.
Her kim aglar il agysyn,
Özüne aglan barmysyň?
Garalan ýüzüm garasyn
Bir gezek görsedim käşgä.
Kimligim kime bildirdim?!
Çyna berimsizdir derdim.
Ömrümi özüm öldürdim,
Ýasyny tutsadym käşgä.
Ýasama agyň deregne,
Bu garyp göwün - tünegme,
Ýalňyz ýyldyz deý ýüregme,
Bir damja damsady käşgä.
Oksuz çenelen tüpeň deý,
Ýaşap ýörün.
Ýürege düşen heňde
Ýaşap ýörün,
Ýaşap ýörün.
Diňläp soňsuz gybatym,
Ýaşap ýörün.
Alyp gaçsana atym...
Ýaşap ýörün,
Ýaşap ýörün.
Ýylgyryp ýigrenseler,
Ýaşap ýörün.
Gözi ýaşly söýseler,
Ýaşap ýörün,
Ýaşap ýörün.
Ýalňyşymy ýassanyp,
Ýaşap ýörün.
Ajalyma gyssanyp,
Ýaşap ýörün,
Ýaşap ýörün.
Özüm urup sola-saga,
Sowalym sygman gursaga,
Bu başym saňa sadaga,
Sadagaň bolaýyn ýol.
Hem gorkym, hem umydym,
Zowalym hem subudym,
Sensiz diri guburdym
Sadagaň bolaýyn ýol.
Çykaran dag başyna,
Imana - gözbaşyňa,
Çarkandagňa, daşyňa
Sadagaň bolaýyn ýol.
Ömür gysga, ýol uzak,
Öz-özüme gurdum duzak,
Gara ýüzüm eýlediň ak,
Sadagaň bolaýyn ýol.
Tobammy sen, ýazygymmy?
Ahyret gün azygymmy?
Ýazylan namazlygymmy?
Sagaň bolaýyn ýol.
Goşgymy dälmi, bilemok. Garaz ýazyşdyrypdyryn. Bir döwür durmuşymyň agyr günleri, kelebimiň ujuny ýitiren günlem ýazylan zatlar. Soňky namaza ýaňy başlan ýyllarym ýazylan bolaýmasa. Eger halan bolsaňyz ýene-de bolmaly, tapyşdyraryn, tapanjamy.
Şol döwürler "Ýaşkomda" çykan bir makalamy goýasym gelýä-de, uzak bolar, sizi ýadadryn öýdýän. Onsoňam "köne saman agdaran ýaly" gerekmi, gerek dälmi onam bilemok. Häzirlikçe şular. Men bularyň goşgy däldigini bilýän, şoň üçinem goşgy ýazmak pikirimi goýdum. Meňki birhili kese-küse bolýar. Goşgy diýlen nagyş ýaly bolmaly. Onda-da özüme gyzykly göründi. Belki siziňem ýüregiňizi gaty gysdyrmaz.
Teswirler (0 sany)
Teswir ýazmak üçin içeri girmegiňizi haýyşt edýäris.