31.10.12
Eý, günleň geçäýşini!!! Bu günler meni bir ýerlere alyp
barýar. Onda-da elimden çekip, howlukdyryp, ylgadyp. Ýagşylygadyr inşalla.
Çünki, aýak diräp, gitmejek bolamok. Geçýämi, begenýän. Ajalyma bolsa-da,
Mekge-Medinä bolsa-da – begenýän. Nejip Fazyl “Her gapyda müň aglap/ Soň gapyda
ýylgyrsam” diýýär-ä. Şu dileg gaty gowy dileg. Birem hezreti Ebu Bekiriň dilegi
bardyr: “Eden işlerimiň iň haýyrlysy soňky edenlerim bolsun, iň gowy günüm Saňa
gowşan günüm eýle!”
Bu
günüm Gurbannazaryň suratlaryny görmek bilen başlandy. Düýn Ylýas alyp geldi. Agşam
iki bolubam gördük welin, bu gün irdenem kompýuterimi açsam, suraty ýalpyldap
dur, özem ýylgyrýar. Mekdepde gutardyş ekzamenleriniň öň ýanlary alynan
bolarly. Mekdebimiziň sport zalynyň öňünde alynypdyr. Olaryň duran ýerine çenli
gözöňüme gelýär. Öten agşam Kemalyň öýüne baryp gaýtdym, gaýdyşyn mekdebimiziň
deňinden geçmeli boldy. Ýagyş ýagýar, alagaraňky, ýykylan mekdebimiziň ýerinde
bir zatlar saljaklar... Gynanara zat ýok. Dünýäň gurluşy şeýle – “Ýykylmak üçin
gur, ölmek üçin dogul!” diýlip gargalan ynsan biz. Allanyň gazabyny!!! Gorkýan.
Gazabyna duçar etmesin...
Teswirler (1 sany)
Teswir ýazmak üçin içeri girmegiňizi haýyşt edýäris.
Ýaşlykda gorky umytdan bir ädim öňde bolmaly, garralykda umyt gorkydan bir ädim öňe geçmeli. Hz. Ymam Gazaly
Ölüm wagtynda bolsa dolylygyna umyda baglanyp gitmeli...