07.11.12
Arada kinorežissýor Halmämmet Kakabaýew bilen barýas welin, “Indiki ýaşlar
oturan ýerlerinden Amerikadan maşyn satyn alýarlar. Oň reňki, ýasalan ýyly,
markasy... – ähli zadyny saýlaýarlar. Biziň döwrümizde maşyn alynanda nähili
uly işdi, seremoniýady. Döwür, dünýe şeýle bir üýtgäpdir” diýýär. Ýetmişden
geçen ýaşulyň biziň döwrümiz diýýänem 30 ýyl töweregi mundan öň bolmaly. Diňe
Türkmenistan däl, tutuş dünýä şeýle güýçli templerde üýtgeýär – gowlugamy ýa-da
tersine – bilmedim. Gowluga üýtgeýär diýesim gelýär. Birgiden gowy mysallar
akylyma gelýär. Mesjitler, ony dolduryp duran ýaşlar... Başga bir tarapdanam
dünýedäki gyrgynçylyklar, sil, Ýer titremesi ýaly belalaryň köpelmegi...
Ýa-da diňe gabygy üýtgeýär-de maňzy şol gadymkylygymyka? Gowsy, özümden söz
açaýyn. Adam garradygyça ganyň goýalyşy ýaly, akylam goýalýar diýýäler. Emma,
özümiň bir çaşka kofe içip oglan ýaly bolýanymy duýýan. Goýulykdan nyşanam
galanok. Hawa, öň telim gezek ýanan meselelerim öňümden çyksa, sakga durýan, diňlejeklere-de
duruň diýýäň. Bar goýulygym şol bolaýmasa. Emma, adam bir zada ýakynlaşdygyça
ony has aýyl-saýyl görmeli dälmi? Duralga ýakynlaşýar, emma, çala duýsam
duýýandyryn, aýyl-saýyl görýän diýip biljek däl. Bir gowy gürrüň eşitdim: Adama
bir ýalňyş, ters işi bir zat şol “et!” diýip dürtgeläp duran bolsa, bu nebsiň işidir.
Eger, bir ters iş kä wagt akylyňza gelýän bolsa, bu şeýtanyň işidir. Sebäbi
şeýtan nebis ýaly yzygiderli dürtgeläp bilmeýär, çeňňegini oklaýar, ilişseň
ilýäň ýogsa-da, sen halas. Emma, nebis welin, mydama böwrüňe dürtüp durýar.
Ine, adamyň ýasalşy-ýaradylyşy nähili öwrenilipdir. Ony kämilleşdirmegiň,
ösdürmegiň ýollary gözlenipdir. Menem, bir wagtlar, studentkäm kitaphana gatnap,
adamyň psihologiýasyna degişli kitaplary ürç edip okaýardym. Adamyň ýüz gurluşy
bilen häsiýetiniň arasyndaky baglanşygy biljek bolýardym. Tanamaýan adamlarymyň
suratlaryny ýygnap, olaryň daş sypatyna seredip häsiýetlerini ýazjak bolardym.
Käsi gaty dogram bolardy. Emma, nirä tarap ösmeli? Nireligene kämilleşmeli? –
bu zatlary asla, bilmeýän ekenim. Ýogsa, ajal hakynda köp pikir ederdim.
Garrylyk, ömrüň manysy, ölüm hakynda hekaýjyklaram ýazýardym. Emma, ne dowzahy
bilýärdim, ne jenneti. Magtymgulyň “Kepene çolan köňlüm” diýýän setirine aklym
haýran bolardy, ýöne kelläme taýak degen ýaly bolmazdy, seňselemezdim. Dogrusy,
oňa düşünmezdim. Häzirem düşünýän diýsem, aýp bolar, belki, öňkümden sähelçe
gowrak düşünjek bolýandyryn. Bu näme üçin beýle?
Teswirler (0 sany)
Teswir ýazmak üçin içeri girmegiňizi haýyşt edýäris.